遲左咁耐 . 終於有時間打反<結婚周年台北之旅>
由於選搭香港航空 , 最早只有 12:30 航班 ,
預計到達台灣機場係 2:00 , 咁再反到酒店大約係 3:00
咁都仲有半日玩 .....
雖然係買優惠機票 , 但航機一啲都唔殘舊
之前三月香港航空首航飛台灣出現嚴重延誤
但好彩今次準時起飛
台灣 .. .go go go
天氣非常好 , 希望台灣嚟緊五日都係咁好天 !!!
飛機上 , 每個位都有獨立電視 ...
仲有電影睇 , 老公揀咗<關雲長>
但個半鐘機程應該睇唔哂 , 唯有睇得幾多得幾多啦 ~~~
飛機餐有好地道嘅星洲炒米 ,
但重辣味又無鑊氣 , 食咗兩啖就放棄lu
留肚到台灣食好嘢 ~~~
好快好快 ..
就到達台北桃園機場 , 時間大約約係兩點 , 同預計一樣
朋友教係未入境之前d到兌台幣個兌換率會高啲
當日兌換率為$1港幣兌3.76台幣
兌換一萬蚊台幣 , 扣除手續費約$2,700
入境攞完行李後 , 就乘搭國光巴士到台北車站
兩人車票為T250 , 約$67
唔同香港機場巴士 , 國光巴士有車票同行李證
車程約一個鐘 , 因為夜晚要去夜市
所以爭取時間上車後先訓一陣補充體力 !!
好快好快 .. 訓醒就到達台北車站 !!!
台北車站內貌 , 感覺空曠但有點殘舊
行程中會有一日到九份 , 咁我地先去售票處買定車飛先
但連續五日朝早七點車票已經沽清
最後買左第二日十一點既車票 , 比原先預計的遲咗四個鐘
因此老公話行程亦會有所更改 , 最後唯有取消十分及菁桐行程 ~~
買完飛 ... 穿過車站既地下街 , 行大約十分鐘路程就到達新驛旅店
比想像中易搵 !!!
checkin 上房 , 房間整潔乾淨 , 浴室寬濶
唯有唔好處係個冷氣口對正床頭 , 調較後亦會吹正頭
最後老公要自己用毛巾堵塞出風口 .. 咁先叫好d呀
跟住安頓好曬已三點半 , 即刻到附近旅遊書推介嘅良品牛肉麵試食 !!
鎮店之寶係紅燒牛肉麵同水餃
牛肉麵好似無味嘅五香肉丁 , 而水餃就皮過厚
真係唔明點解旅遊書推介為必食 , 消費為T160 , 約$43
食飽飽就搭捷運去中正紀念堂站
車站樓底比香港的為高，感覺好濶絡
中正紀念堂係台北必到景點 , 周圍都有指示 , 極易搵
自由廣場 & 中正紀念堂留影
中正紀念堂內入面仲有個紀念館主要介紹蔣中正生平事跡
參觀後天色極靚 , 夕陽斜伴紀念堂
真係好靚 ...
跟住下一站到港人必到之西門町 , 捷運西門站一出就到
西門町似足旺角 , 啱哂後生仔 , 應該越夜仲會越旺
西門紅樓位於西門町路口
為歷史建築物 , 現開放為藝術中心
入去行左個圈 . 無野睇 ...
台灣人應該喜愛飲咖啡啦
周圍都係咖啡店
而西門町出名的咖啡店為蜂大咖啡
店內裝飾簡約
同老公睇左陣 ... 點左杯招牌水滴冰咖啡
但唔記得咗影相 , 唯有用餐牌補數
咖啡不過不失 , 但咖啡味淡左d
消費T85 , 約$23
西門町有勁多商場 , 個個都好似旺中個d咁
真係啱哂shopping
街頭又有好多地道小食
撞啱仲有藝術愛好者表演噴漆畫 , 好靚呀
行到攰 , 我地晚飯就揀咗喺"樂也"食任飲任食自助燒烤
其實有好多間 .. 最後點解揀d間呢 .
我都唔記得 .. 哈哈
不過都無揀錯 .. 因為有好多野食
上到去先知 ... 原來除左有得燒仲包埋打邊爐
有肉有菜有帶子兼且有haagen-dazs雪糕
埋單兩位 T1098，約$292
任飲任食都只係三舊水 , 真係好抵呀 !!!
食完約大約11點 , 行多陣就搭捷運返旅店休息準備聽日九份行程啦 !!!!
**************************************
Love & Thanks
詩詩 : tansilvia@hotmail.com
www.tansilvia521.blogspot.com
沒有留言:
張貼留言